Remitido y foto: Urumeako Mendiak Bizirik 3 Mayo 2026
Martxoaren 23an Endesak (Enigma Green Power enpresaren bidez) Ikatz Gane proiektua aurkeztu zuen: Ereñotzuko lurretan gauzatu nahi duen parke eolikoa, inguruko bizilagunen iritzia eta eremuaren korridore ekologiko izaera aintzat hartzen ez dituena. Eztarriak estutu zizkigun. Proiektuak jasotzen ditu 112 metroko altuerako bost aerosorgailuren eraikuntza, 30 kiloboltioko sekzionamendu-zentroa eta 7,425 kilometroko aireko eta lurperko linea elektrikoa. Jasotzen du obra gauzatzeak duen aurrekontua: 40,7 milioi euro. Ez ditu jasotzen, aldiz, handik metro gutxira Repsol enpresak eraiki nahi duen parke eolikoaren inpaktua, azpian gelditzen den Arano herriak izango dituen kalteak, edo makroproiektu bat eraikitzeak sortuko dituen ondorioak tamaina horretako piezak mendian gora igotzeko eraikiko dituen bideekin, esaterako —8 metroko karreterak, aprox—. Dirua, porlana eta kanpo-interesak, eternalki argindarrez hornituko gaituzten promesan.
Honen aurrean eta denboraren kontra, hainbat bolondresek egindako lanak proiektu honen atzean dagoen manipulazioa, informazio-eskasia eta atzera bueltarik gabeko kalteak salatzeko balio izan du. Ez da erraza izan, baina izan da aberasgarria. Elkartu gara, izugarrikeria honen aurrean, horrelako ereduak ez ditugula nahi esateko. Ez hemen, ez inon. Ikatz gane bezalako ereduek eraiki baino, suntsitu egiten dutelako. Ez gaudelako prest edozer gauza edozeinen eskutik edozein lekutan eta edozein modutan egitea onartzeko. Are gutxiago, horrek onurarik ekartzen digula esan dezaten, etekinak aurretik ere aberasten ari diren enpresentzako direla garbi uzten baitute. Maite duguna eta gizarte bezala behar duguna txikitzetik eraiki nahi dutelako irtenbide “berdea” deitu nahi dioten hori.
Gaur, 3512 herritarren ezinegona eta ezezkoa aurkeztera etorri gara hona. 3512 herritarren eskaera, Ikatz Gane geldiarazteko. 3512 herritarren baldintza, energia auziaren irtenbideak herriarekin eta ingurugiroari begira har daitezen, eta ez enpresa dirudunen poltsikoei begira. 3512 helegite hauek guk aurkezten ditugu, baina 3512 herritarren izenean gatoz.
Urumeako Mendiak Bizirik plataformatik eskerrak eman nahi dizkizuegu hilabeteko epean babesa eskaini diguzuen guztiei, helegiteak sinatu dituzuenei, zabalpenean lagundu duzuenei, zuen espazioetan sinadurak jasotzen ibili zaretenei eta gaia ahalik eta jende guztiarengana iristea ahalbidetu duzuenoi. Eskerrak eman nahi dizkizuegu, baita ere, zuen eskutik helegitea zuzenean aurkeztu duzuen guztiei ere, badakigu batzuk izan zaretela eta. Era berean, maiatzaren 4era arte epea zabalik dagoela gogorarazten dugu, eta oraindik egin ez duena bertaratzera animatu nahi dugu, helegiteak Donostian, Andia kaleko 13. zenbakiko bulegoetan edo zuen herriko (edozein herri) udeletxean aurkeztuz. Eskerrak ere, erabateko modu inposatuan eta ustiatzailean eraiki nahi dituzten makroproiektuen aurka Euskal Herria osoan altxatzen ari zareten beste borrokei, indarra ematen diguzue eta inspirazio zarete.
Manten ditzagun Urumeako Mendiak Bizirik! Jarrai dezagun proiektu txikitzaileen aurrean erresistentzian! Makroeolikorik ez! Mendiak ez du barkatuko!
- Remitido y foto: Urumeako Mendiak Bizirik 3 Mayo 2026
- redaccion@gipuzkoadigital.com 3 Mayo 2026
https://gipuzkoadigital.com/
Urumeako Mendiak Bizirik